بسم الله والحمد لله والصلاة والسلام على رسول الله, إن الحمد لله نحمده ونستعينه ونستهديه ونستغفره ونعوذ بالله من شرور أنفسنا ومن سيئات أعمالنا, من يهده الله فلا مضل له, وأشهد أن لا اله الا الله وحده لا شريك له وأشهد أن محمداً عبده ورسوله
♥ يلا نتعـــــــلم فقــــــــــــه ♥ ♥
طيب ايه هو الفقه وليه حنتعلمه ؟؟؟ تعالو نتكلم باختصار عن النقطتين دول علشان نعرف أهمية الفقه
الفقـــــــــــــــــــــه
في اللغة كلمة فقه معناها : الفهم والفطنة و العلم .
فـ العلم الشرعي الفقه هو : العلم بالأحكام الشرعية العملية المستنبطة من أدلتها التفصيلية بمعني آخر : هو العلم الذي يبحث لكل عمل عن حكمه الشرعي بالدليل من القران او السنه
طيب نقول بقى ليه حنتعلم فقه حنتكلم عن أهمية الفقه من خلال الكلام عن بعض فروع الفقه
1- فقه الطهارة طبعا ده من الفروع الهامة جدا وديما اي حد بيدرس فقه يبدأ بفقه الطهاره لان بدون طهاره لن تصح اي من العبادات اللي بتشترط الطهاره زي الصلاه مثلا وفـ فقه الطهاره بنتعلم امور كتير بتهمنا عن الوضوء و التيمم والغسل وأحكام الحيض وغيرها من الامور الهامه اللي قد يكون بعضنا ما يعرفهاش قبل كده
2- فقه الصلاة طبعا مش محتاجه اتكلم عن اهمية الفرع ده من الفقه لان احنا عارفين ان الصلاة ثاني ركن من أركان الاسلام و هيه اللي بين المسلم والكافر من تركها فقد كفر حد يقول طيب ما احنا بنصلي يعني وعارفين الصلاه من واحنا فـ المدرسه !!! حقولك كلامك صح بس في امور اكيد متعرفيهاش وفي حاجات ممكن تكوني عرفاها وبتعمليها بس مش صح اصلا فـ فقه الصلاه حنتعلم فيه باذن الله كتير من الامور دي و حنعرف شروط صحة الصلاه و حنعرف كيف كان كان يصلي النبي صلى الله عليه وسلم و حنعرف مبطلات الصلاه و غيرها كتير من الامور المتعلقه بالصلاه
3- فقه الصيام و ده برده من الفروع الهامه و الصيام هو الركن الرابع من اركان الاسلام وهو فرض طبعا على كل مسلم بالغ عاقل وبرده الحمد لله اغلبنا عارف كده وبنصوم تمام طيب حنتعلم ايه بقى فـ فقه الصيام ؟؟؟ حنعرف بقى اكتر عن معنى الصوم وفضله ومبطلاته و أحكام الصوم للمسافر و لو حد مات وعليه صيام نعمل ايه ؟ ولو كنتي مش بتقضي الايام اللي عليكي زمان تعملي ايه و لو واحده مستحاضة تصوم ولا لا و لو واحده حامل او مرضع او مريضه امتى تصوم وامتى تفطر وايه الافضل ليها ؟ كل دي امور مهم جدا نتعلمها ونعرفها
4- فقه الجنائز في الفرع ده حنتكلم عن الصلاة على الميت وغسل الميت والكفن و لو كنتي فـ مكان و حد بيموت فيه المفروض تعمليله ايه و احكام التعزيه وغيرها .
5- فقه الحج برده من الفروع الهاااااامه جدا وكتير تلاقي واحده تقول انا ححج باذن الله السنادي ومش عارفه المفروض اعمل ايه او تقول حعمل عمره ومش عارفه الخطوات ازاي ....... قوليلي اعمل ايه من اول ما اطلع من بيتنا لحد ما احج او اعمل العمره و ارجع تاني باذن الله و واحده تانيه تقول انا حكون حائض ف وقت الحج او العمره اعمل ايه ؟ برده كل ده باذن الله حنتعلمه سوا
6- فقه النكاح اكيد برده مهم جداااااا الفرع ده مهم تعرفي ايه حقوقك و ايه واجباتك كزوجه وتعرفي صفات الزوج الصالح وتعرفي تختاري ازاي شريك حياتك وايه حدودك فـ فترة الخطوبه و هل العلاقه قبل العقد تفرق عن بعد العقد و هل العاقد له حقوق الزوج كامله ولا لا ؟ وامور اخرى متعلقه بالباب ده حنعرفها سوا باذن الله
دي كانت بعض فروع الفقه وأهمية كل فرع منهم باختصااااار
باذن الله نتكلم فـ كل اللي يهم المرأه من الفروع دي و حنحاول نختصرها على أد منقدر علشان منطولش عليكم
وباذن الله ناخد اكبر قدر ممكن من المعلومات ف كل فرع حنتكلم فيهو نتعرف عليه ونتعلمه سوا
وخلي بالك انتِ لما تتعلمي فقه مش حتفيدي نفسك بس لاحتفيدي اللي حواليكي كمان بنشر العلم اللي اتعلمتيه وخلي نيتك خالصة لله وانتي بتتابعي معانا
نسأل الله التوفيق و السداد وأن يجعل جميع اعمالنا خالصة لوجهه ويتقبلها اللهم امين
مشاركة
|